香港新浪網 MySinaBlog
« 上一篇 | 下一篇 »
fighting phoneix | 25th Jun 2009, 17:18 | 一般 | (227 Reads)

此文章得罪既人太多,而且學文少所講,寫blog就係要吹水嫁啦?唔係寫黎做乜姐?(笑)

唔鍾意既、覺得我扮聖人既、覺得我食飽飯冇事做既,我冇所謂~~

 

 

 

       有人話梅窩居民比人喪插,覺得梅窩人比網民咁樣鬧法,變成過街老鼠,係好慘,係好可憐,覺得咁樣好恐怖。唔好意思,我唔認同,我完全覺得係佢地自作自受,唔抵可憐添!點解?咁就要講番梅窩居民比人喪插既原因。梅窩居民比人喪插就係因為梅窩人在諮詢會(姐係批鬥大會)爆大鑊,左一句「吸毒仔」,右一句「吸毒妹」,鬧到人地喊,仲要用埋d下三流招數!正生書院人士一講野,佢地就勁噓、打斷人地既講話、破口大罵、不斷叫囂,又用一班小朋友同老人家圍人地,玩群眾壓力,跟住去遊行果陣,仲有人扮喊添!大佬,你咁大反應做乜q姐!正生書院搬入黎都唔洗死姐,洗唔洗喊打喊殺呀!?依家人地傾都未同你傾,你就發晒癲,比人覺得你完全唔講道理,d人性出晒黎,比人知道原來梅窩居民係「生番」黎,玩歧視玩到出晒面,咁樣你比人鬧,比人喪插,就係抵死啦?就係自己攡黎衰囉?你咁鍾意批鬥正生書院,咁依家咪比機會你試下比全香港人批鬥既滋味係點樣囉?呢d就係報應啦!?如果一開始就心平氣和、平心靜氣慢慢同人講道理,態度好d咁樣講出你既訴求,就唔會搞到今日咁大件事啦!如果梅窩人係識做既,依家出黎大大方方咁樣接受正生書院,咁就皆大歡喜啦?唔洗再死頂啦?唔洗再比人喪插啦?日後同政府同其他人要求起d乜野,講利益,都「易辦事」啦?

       睇完來恩post上黎既舊報章之後,我就更加唔覺得政府在呢件事上有咩野大問題!原來當年南約區中學被殺前都有幾個辦學團體都想繼續搞,學校被殺後,地區人士都想用南約區中學。可能你會問,既然有咁多團體想搞,咁點解政府仲唔批呢?政府係咪懶懶閒呢?有人想搞一條龍學校、有人想搞大學分校、有人想要band1中學、有人想搞天主教學校、有人想搞基督教學校、鬼佬又想搞國際學校或者英文學校、有人又想搞津校......但問題係你有計劃都唔係奉旨比你嫁麻?!依家既遊戲規則就係,你搵唔夠人,你達不到呢個標準,你就唔可以有學校!殺校政策無論係東區、南區、西區、北區都係一樣!唔係你話有人想開間學校就要比你嫁?呢d團體根本交唔出一份實際同埋令人滿意既計劃,佢地既計劃根本就是不切實際既!連自己究竟想點都未搞清楚,政府就梗係采你都有味啦!咁問題又黎喇,兩年過左去,咁政府都冇理由再讓南約區中學繼續空置咁浪費嫁麻?唔係又會比人鬧嫁啦?!咁正生書院覺得梅窩既南約區中學好適合佢地搬去,而且正生一早已經申請左,加上正生書院又真係有好迫切性既需要使用南約區中學,因為正生既舊校舍好危險,直接危及學生既生命安全。如果真係出左事,有人受傷或者瓜柴,咁邊個負責先?去到呢度,可能你會問,有部分梅窩居民夠好需要南約區中學既校舍啦?但係事實上梅窩居民都可以去大澳同東涌番學!根據維基百科所講,由梅窩坐巴士去東涌,只需要42分鐘左右!計埋等車時間,最多咪一粒鐘?有幾辛苦姐?問題係你自己嫌人地唔係band1,所以唔去讀之麻?咁就唔關人事啦?如果唔係都唔會比人踢爆自己既仔女原來係山頂番學啦?你講到咁著緊間南約區中學,做咩唔一早放棄band1名校,走番去讀南約區中學?而且正生書院同梅窩居民兩者相比,一個人命關天,一個唔係,而利益點都大唔過人命!邊個更有需要用間學校,唔洗我多講啦?!南約區中學塊地係政府地,唔係私人地,加上有南約區中學呢間現成既學校,又唔洗再花咁多$去起一間新既校舍,所以政府就再提出比正生書院搬去梅窩囉,不過唸唔到仲係有咁多人玩歧視去反對正生搬入咁解姐?!你又會話,既然大家覺得正生無問題,咁就搬去其他地方開囉?要遠離市區?去東坪州,去東龍島,去蒲苔島啦?唔係話搬去第二度唔得,但實際上唔係你話去邊就去邊嫁麻?你都要睇正生點樣選擇嫁麻?都要正生覺得果度係適合先至嫁?雖然正生覺得邊度合適、究竟要d乜野條件,你同我都唔知,大家都係估估下!但好明顯南約區中學既校舍就係佢地既首選囉?

        再講,正生遷入梅窩同梅窩冇中學根本是無關連!何解梅窩居民硬要將正生遷入南約與梅窩要有中學拉埋黎講?梗係啦,唔想正生係隔離,就梗係要出師有名,作個理由出黎混淆一下視聽,借題發揮至得嫁?仲有,自己身有屎,咁就梗係要搵地方去賴左佢先至得嫁?最簡單最理想既地方就係賴落政府度啦?總之乜q事都係政府既錯,係社會既錯啦?再唔係既,你只要將「利益大過天」當成係座右銘就搞掂啦?再勁d,仲可以動不動就用資格說事,好似小朋友搏咀咁樣:「呀邊個邊個仲衰啦?全世界既人都係自私啦?你夠有歧視啦?你夠自私啦?你有咩資格鬧我?」一句說話就將d責任推得一乾二淨!全部人都冇資格討論!仲唔玩晒?好,講資格,梅窩人又有資格係度嘈咩?首先,有人話正生書院是感化戒毒所、帶有懲教性質,所以就是嫌惡性公共設施,會影響樓價!我就覺得非常搞笑喇!正生書院是一所按教育條例註冊的私校,受到教育政策和條例規管,校內並無戒毒設施。既然冇戒毒設施,你憑咩話正生書院是戒毒所?仲講乜野話係嫌惡性公共設施?你憑乜野話會影響樓價?你最多只可以話正生是特殊學校!再講,我又當正生真係嫌惡性公共設施,政府真係「霸王硬上弓」,屈你去「啃」咁又點呀?其他地區有發電廠、焚化爐、堆填區,會直接影響健康,仲更加難「啃」添!咁人地都未嘈啦?又幾時輪到梅窩人嘈先?咁就係度阿支阿咗?點解梅窩人就有唔駛盡社會責任既權利?唔通梅窩人就矜貴d咩?唔通梅窩人個個都係大爺、係皇帝,你話乜就乜?當然你要死拗硬拗話人地唔嘈係佢地既事,咁我就冇野好講啦?其實只要你住既地方適合去起呢d所謂既嫌惡性公共設施,咁就實有機會起係你附近嫁啦?係遲早既問題黎既姐?有咩咁大驚小怪呢?而且其他地區既人都有「啃」過呢d野啦?既然梅窩以前未「啃」過呢d野,依家輪到你「啃」番一次,點解唔得呀?大家一人「啃」一次,好公平wo?除非呢d嫌惡性公共設施次次都起係你隔離,咁你先至好出聲啦?如果仲係咁唔鍾意,有本事就搬走囉?有本事就去移民囉?有人話政府玩假諮詢?玩「霸王硬上弓」好無賴?我就話係唔係乜春都要諮詢一餐呢?一時話政府咁鬼軟弱,冇黎主見,一時又話政府唔聽你意見,一意孤行。做又比人鬧,唔做又比人鬧,為反對而反對,為鬧而鬧,究竟想點呢?計我話政府應該要更加強硬先至係!政府唔可以就咁樣低頭,唔可以屈服於呢班人既歧視!如果佢地咁樣都可以迫到政府讓步,政府姐係間接縱容歧視,咁仲更加無賴!呢個先例一開,以後政府乜野政策都唔洗推出黎啦?以後興建乜野特別設施又唔洗起啦?

       又有人話「自己唔想要,就逼梅窩要左佢」、「換轉正生搬去你屋企附近,你咪又係反對」......呢d論調根本就係陰謀論!根本就係有人作出黎既!係有人幻想出黎既!依家既事實係,有很多人都歡迎正生搬入自己既地區,問題係自己既地區係咪真係適合正生搬入,同埋正生覺唔覺得你果度係好地方姐?你又可能會話「口講無憑」,「你依家up乜q都得嫁啦?」Fine!到正生真係想搬入其他地方,而又有人真係好似梅窩居民咁樣強烈反對,果陣你要鬧人地虛偽都未遲啦?

        最後,你可能會話「人就是自私嫁啦?阻人發達猶如殺人老母!」不過,我認為今次呢件事,就是要教訓我們做人唔好太自私,將利益看得太重囉?

 

 

延伸閱讀:正生﹑網絡與道德批鬥

     正生事件關你乜事?

     正生書院遷梅窩 本質是教育問題

     梅窩居民,請不要太自私

     逆向思維看正生

     梅窩的綠壩

     我看正生

     糖衣外殼包不住歧視底蘊

     正生書院之極討厭幕後黑手

     找死~~為梅窩居民說話

     請對正生書院有愛

     正生泡沫

     梅窩居民想要甚麼?

     正生書院風波.與慈悲

     無情的梅窩居民

     寫給正生書院同學

     正生的善與梅窩的惡

     正生書院 - 香港人的悲哀

     正生風波‧這是香港問題,不是梅窩問題

     正生書院風波五分鐘內可解決

     別讓正生再流淚

     自私 - 是梅窩人還是香港人?

     正生書院搬遷事件的雜思雜想

     互相體諒的正生風波

     正生六一四

     不吐不快

     俾次機會


[1]

稍安無躁。

灰先生
[引用] | 作者 灰先生 | 25th Jun 2009 17:27 | [舉報垃圾留言]

我冇躁,只不過今次用口語,易d表達姐~平時寫文果陣都要用書面語,好煩~而且今次我覺得好好笑姐?

[引用版主回覆] | 作者 fighting phoneix | 25th Jun 2009 17:56

[2]

現在搞咗咁大件事,正生搬入去和唔搬,同那裹的居民都無好結果,唉! 兩敗俱傷...

linerak
[引用] | 作者 linerak | 25th Jun 2009 19:29 | [舉報垃圾留言]

根本就係梅窩人既問題,正生係長洲冇事,點解係梅窩又出事?講到尾,就係有人是「文塞」

[引用版主回覆] | 作者 fighting phoneix | 26th Jun 2009 12:34

[3]

所謂「影響樓價」…
你仲住緊未賣,又有乜關係?
差餉仲可能平啲,
而且投資唔係賺硬咖嘛!(如果睇到「樓價」咁大,就已經係炒樓而唔係買樓啦)

陸宜
[引用] | 作者 陸宜 | 25th Jun 2009 21:26 | [舉報垃圾留言]

依家梅窩個名已經搞到臭晒,乜仲有人想去投資,仲有人想去買樓咩?仲有人想去果度消費咩?

[引用版主回覆] | 作者 fighting phoneix | 26th Jun 2009 12:36

[4]

第一﹐我唔覺梅窩居民可憐﹐我係覺得班友死狀恐怖﹐我係覺握驚。
第二﹐你少同我大義凜然﹐成件正生書院事件﹐當中有集體利益所在﹐集體利益去到最終﹐牽涉個人利益。青少年問題﹐係社會整體責任﹐但而家就將集體利益凌架於小眾利益﹐要人家犧牲自身經濟利益﹐去幫社會問題埋單!
第三﹐一群人實質經濟利益被侵害﹐社區訴求被莫視﹐無力反抗﹐只能竭斯底里係一個假諮詢會宣泄不滿…而家你竟然認為﹐因為對方竭斯底里﹐所以利益被侵害﹐亦係咎由自取。點解你唔諗下﹐好地地﹐係咩原因令對方竭斯底里﹖
第四﹐係咪就係因為一群人﹐係自己被人侵害權益一刻﹐唔識得面對傳媒﹐唔識得控制情緒﹐果班人就唔係受害者﹖
第五﹐你講過好多次﹐其他社區都有類似大石責死蟹式興建嫌惡性設施﹐只代表政府做法一向大石責死蟹﹐不公現象常見﹐並唔會令唔公平變得公平。

文少
[引用] | 作者 文少 | 25th Jun 2009 22:24 | [舉報垃圾留言]

1.恐怖?文少你有乜風浪未見過?咁都恐怖?(笑)

2.大義凜然?講真,就係過左某個底線,所以我先至出聲。至於利益,其實我份人都好講利益,但呢個世界唔係乜春都講利益,去到某d事情,你要講番道義。呢件事,我係唔贊成用利益出發,不過有人係要講利益,所以我先至奉陪,話「既然全世界都要負起社會道義,點解剩係梅窩人唔洗呀?」「既然有人肯為集體利益付出,點解梅窩人又唔肯?」

3同4,社區訴求被政府漠視,政府對你唔好,你就用番呢個怨氣對待正生書院既人,好似政府對待你咁樣對待番其他人,咁樣得咩?係度話「我反對正生,因為政府好『不該』!因為政府對我唔好,所以我都唔可以比其他人(正生書院)得到任何著數同幸福!」乜呢d都係道理,乜呢d都係理由黎嫁咩?你有乜唔滿意,自己同政府搞掂佢,做乜拉埋正生落水先?做乜借題發揮先?好似小學生咁樣,為左吸引人注意,所以你就「蝦」其他同學仔,咁樣低唔低能d呀?

5.已經講過,咁唔鍾意,移民囉?興建乜春嫌惡性設施都有人反對,不如全部唔好起囉?

[引用版主回覆] | 作者 fighting phoneix | 26th Jun 2009 13:18

[5]

最後漏一個point﹐就係
你信一套道德觀﹐我信一套道德觀﹐只要我所作所為無犯法﹐你無權逼我信你一套道德觀﹐甚至用你套道德觀作為理由﹐侵害我實質利益。否則﹐就係一種逼害。

文少
[引用] | 作者 文少 | 25th Jun 2009 22:29 | [舉報垃圾留言]

又唔好講逼咁嚴重wo?你同我都係吹下水,發表意見姐?係度吹水會有咩利益呢?我都冇銀兩收~(笑)

[引用版主回覆] | 作者 fighting phoneix | 26th Jun 2009 13:23

[6]

你少有地咁好火喎

其實如果梅窩咁介意正生既話,正生搬入屯門;之後屯門比個焚化爐比佢啦

Gabriel
[引用] | 作者 Gabriel | 25th Jun 2009 22:49 | [舉報垃圾留言]

我冇火呀?我只不過覺得呢壇野好搞笑姐?所以先至係度「發up風」姐?你個提議唔錯~

[引用版主回覆] | 作者 fighting phoneix | 26th Jun 2009 13:26

[7]

如果班居民控制一下自己的情緒, 事情就唔會搞到而家咁大俾班傳媒搵到位入

不過一個月後, 一切又會回復平靜 ......

Daynight
[引用] | 作者 Daynight | 26th Jun 2009 08:47 | [舉報垃圾留言]

冇法子,有人野蠻,EQ低,搞到咁就係自己攞黎衰囉?

[引用版主回覆] | 作者 fighting phoneix | 26th Jun 2009 13:30

[8] 同政府講規則?你傻架?
fighting phoneix :
依家既遊戲規則就係,你搵唔夠人,你達不到呢個標準,你就唔可以有學校!殺校政策無論係東區、南區、西區、北區都係一樣!
.......
再講,正生遷入梅窩同梅窩冇中學根本是無關連!
.......
就是要教訓我們做人唔好太自私。


規則邊個定先?係政府丫嗎。學你話齋,一切依戲規則,我地仲有得反對咩!殺!殺!殺!莫講話殺校啦,殺人都仲得呀!(我唔係指香港政府呀)
再講,梅窩想要間中學同正生遷入梅窩根本冇關連!咁點解你又一定唔畀人地舊事重提先。來恩都畀左好多料你睇架啦!我覺得佢地依家爭取係最好時機,因為所有議員同官員都仆哂黎丫嗎。
我倒唔覺得你係扮聖人,反而唔覺得你係扮緊聖女(貞德),要由梅窩人手上奪取南約。你既崇高目標只有一個,「教訓梅窩人」。你真係有為正生諗過咩?

九龍居民
[引用] | 作者 九龍居民 | 26th Jun 2009 10:42 | [舉報垃圾留言]

做咩呀?我幾日冇上網姐,你就急不及待同我「開片」拿?(怒+笑)

邊個唔比你反對姐?唔跟政府果套規則?唔好玩我啦,唔通跟你果套咩?你搵夠人,政府想點「殺」都「殺」唔到啦?問題係你搵唔搵夠囉?

點解依家先黎舊事重提?主要原因真係為左利益?唔好當人地係白痴先至得嫁?就係囉,依家班官黎晒,仲唔搵機會借題發揮?獅子開大口?好似小朋友咁樣發爛渣?

講得好!你已經將個中心問題講出黎!問題就是出於梅窩人身上!要幫正生,只要搞得掂班梅窩人,就搞得掂件事啦!所以我用既方式,就係「教訓」同「鬧」囉?

[引用版主回覆] | 作者 fighting phoneix | 26th Jun 2009 13:49

[9]

呢件事好多唔理性既說話開始出現. 好似你o甘, 講o左好多理由, 但鍾意幫梅窩既人都聽唔入耳.

亞占
[引用] | 作者 亞占 | 27th Jun 2009 20:43 | [舉報垃圾留言]

以利益出發的人的確唔會聽得入耳

[引用版主回覆] | 作者 fighting phoneix | 29th Jun 2009 03:36

[10]

那些居民確實是不理智了一點.這樣會讓人覺得沒教養..

Miu
[引用] | 作者 Miu | 27th Jun 2009 23:37 | [舉報垃圾留言]

佢地既小朋友會比家長教壞了

[引用版主回覆] | 作者 fighting phoneix | 29th Jun 2009 03:38

[11]

正生幫同學仔,可能有D都係住梅窩0架,相煎何太急呢....

幫佢地一把,最終可能是自己受惠....

MinSin
[引用] | 作者 MinSin | 11th Jul 2009 09:07 | [舉報垃圾留言]

梅窩既同學仔係好乖的,不會吸毒(真)

[引用版主回覆] | 作者 fighting phoneix | 12th Jul 2009 23:17

[12]

人性本來就是醜惡的,他們為了自己的利益可以想盡辦法去阻止正生搬入。可是我們仍然要想到的是,我們應尊重當區居民我意願,可以肯定的是他們表達了不願意。
記得以前青衣的焚化爐嗎??知道現在仍有人反對機鋪、酒吧起在家附近嗎??
這都是關乎當地居民的生活,我們應該忽略這個意願嗎??要別人啃了不好的東西、就可以說你也應該啃不好的東西???一如我們吃牛吃豬,就可以迫人吃牛吃豬嗎??
人的意願有多重要???我們香港法例都有保障了的,就如強姦等罪行,我們的意願可以忽略了,那麼不但法例可以全改,香港也不必再搞甚麼選舉了。

hugo
[引用] | 作者 hugo | 12th Jul 2009 20:10 | [舉報垃圾留言]

冇錯,「人性本來就是醜惡的」,所以你覺得用下三流招數阻止正生搬入都是應該、是正確的話,咁就冇野好講啦?「人性本來就是醜惡的」,是這麼大的一條道理!做左衰野,之後講一句「人性本來就是醜惡的」,咁樣就可以當乜野都冇發生!?

依家邊個唔尊重當區居民既意願?依家有邊個唔比居民佢地出聲?有邊個唔比居民表達佢地既意見?不過呢個世界,我尊重你既意見唔一定=要接受你既意見!我亦可以作出批評!唔係你話唔想正生搬去梅窩,咁就奉旨答應你既要求!呢個世界唔係你話乜就乜!既然你比既理由同埋要求咁唔合理,我做乜要比你?

對!關乎當地居民的生活!不過其他地區既人都已經作出讓步,啃了更多不好的東西,負起社會責任!為何唯獨梅窩居民可以不負起社會責任?香港呢個家,點解佢地冇份去承擔呀?

[引用版主回覆] | 作者 fighting phoneix | 12th Jul 2009 23:42