前果排，睇見文少寫「討厭方大同」寫得咁過癮，啟發左我想寫番篇「討厭謝安琪」，不過正想寫既時候，就遇著最近係sinablog爆晒大獲既「Uncle Ray亂扣帽子兼鬼祟引用事件」!既然咁高興，我冇理由唔出番篇文幫幫手搞大佢嫁?好，我就索性先轉移目標，將「討厭謝安琪」一文暫時押後，先寫一篇「討厭Uncle Ray」!
或者有人唔知Uncle Ray係乜水，又或者以為我係講緊電台DJ Uncle Ray。我在此再清清楚楚，指名道姓講一次，我係講緊香港sinablogUncle Ray's Corner(連條link都比埋你)既blog主Uncle Ray。除此之外，並無其他人。如果其他人發神經要對號入座兼自認既話，唔關我事。
討厭Uncle Ray，當然唔係樣既問題，因為我根本就唔知佢長乜野樣，亦都冇興趣去知。要講我點解咁討厭Uncle Ray，就一定要想下當年。
想當年，其實姐係舊年(笑)，我開始係sinablog寫文，初初寫blog，當然要去老手bloggers既blog度睇文章學野啦?Uncle Ray既blog自然就係其中一個，初初我同佢既關係很好，大家仲會互相回覆留言添。不過時間耐左，我發覺佢同我既政治立場好唔同，佢係民主派既死忠fan屎、反共產黨、鍾意英國佬統治香港，而且唔鍾意持相反政見既人去佢個blog留言，總之佢覺得任何反對佢政見既人就即係「共狗」。沒關係，我唔去佢果個blog度講政治，就唔會有問題啦?自然就唔會有爭拗啦?大家繼續做網友囉?
不過，事實證明我既唸法係過分理想化。話說今年64果陣，刁民公園既葉一知寫左篇文章六四論壇發人深省，咁我就反駁呢篇文章部分所講既野，兼且批評柴玲走佬。點知Uncle Ray就即時留言鬧我，連唔關事既來恩同埋文少都鬧埋!仲鬧我地係「共狗」!大佬，我批評柴玲走佬姐，你就扣我帽子，話我係「共狗」?你冇野下話?自此之後，Uncle Ray同我就決裂，詳情可以睇番江湖逐客令3之番外篇!
雖然大家是決裂左，但我仍然有去佢既blog度睇文章，我未去到討厭佢既地步。不過，最近Uncle Ray「亂扣帽子兼鬼祟引用事件」搞到好大，雖然同我冇任何直接關係，但就徹底令我討厭佢!話說最近十月一號國慶，有班bloggers就好開心咁樣係blog度發文或者post相慶祝呢個開心時刻啦?不過，反共反到上腦既Uncle Ray梗係要乘機抽水唱反調，鬧下共產黨先至安落啦?所以佢就寫左篇還有誰比共產黨好？，之後又寫左篇為殺人政府歡呼的一群，引用晒果班慶祝國慶既bloggers既文章，用黎作批鬥之用啦?老屈果班慶祝國慶既bloggers係冇良知、係「共狗」啦?屈佢地為殺人政府歡呼啦?而且仲刻意唔剔「發送引用通知」，等果班bloggers係唔知情既情況之下比佢批鬥囉?
OK，你要嘈，你要玩批鬥，有咩所謂?你堂堂正正去嘈，你堂堂正正鬧交囉?光明正大d啦?係度鬼鬼祟祟玩偷襲，搞一言堂，算乜野英雄好漢啊?算乜野男人啊?我生平最憎就係呢種人!其實Uncle Ray之前都有玩過偷襲抽水，不過最近愈來愈過分!點解Uncle Ray唔剔「發送引用通知」呢?有腦既人都知道佢咁樣做係因為驚囉?驚人地留言回應佢囉?驚人地串到佢一棟都冇囉?咁點解佢又驚人地串到佢一棟都冇呢?講到尾，就係因為佢冇料囉?冇料反駁囉?唔係既話，洗乜驚人地串佢呢?
之後更加PK既就係，當Uncle Ray奸計唔得逞、比人知道佢玩偷襲既時候，佢就作一堆借口出黎轉移視線、隱瞞事實、做左又唔肯認!完全同佢口中所講既共產黨一模一樣!一個剩係識玩鬼祟偷襲、講一套做一套、鍾意一言堂、永遠唔認錯既人，sinablog裡面根本搵唔到第二個!試問，一個咁樣既人，我可以唔討厭佢咩?!
延伸閱讀： 六四論壇發人深省
