香港新浪網 MySinaBlog
« 上一篇 |
fighting phoneix | 1st Jun 2012, 12:59 | 一般 | (241 Reads)

 

       記得在2年半前因為舊手機唔小心跌左落廁所,搞到要買過部新手機Sony Ericsson T715。如今這部T715唔知發生咩野事又壞埋,所以被迫之下又要買過部新手機。係依家呢個年代,T715呢d手機根本就唔再符合我既要求,所以係時候轉買智能手機了,即使今次要花許多錢。

       在手機既機海裡,我會如何選擇?我認為買手機最緊要就係方便實際,所以我絕對唔會買i-phone。為什麼唔買i-phone?i-phone不是有許多強大功能的嗎?冇錯,i-phone確實有許多強大功能,不過我覺得一部手機用內置式電池,唔可以換電,係絕對唔合格兼且呃錢。如果你部i-phone唔夠電,要就住就住黎用既時候,即使佢有多強大既功能,都係無用武之地的。不過可能你會話,唔夠電既時候,可以用外置充電器黎充電咪得囉。但我覺得要帶個 「尿袋」,一路插住部i-phone黎用,係低能兼白痴。咁可能你又會話,加大部手機既電池容量咪得囉?唔好意思,部手機太多電,好容易會爆炸,事實上外國已經有呢d案例,所以手機電池太多電係有安全問題既。最後,點解我會話唔換得電既手機係呃錢?好簡單,每日都充同一舊電,舊內置電池好易會收皮。如果舊內置電都收左皮,即係成部機都要收皮,用唔夠一兩年又要花錢買過部新手機,咁樣根本就係呃錢。

        另外,我覺得外形設計都好重要。如果部手機好樣衰,但你又要日日都對住佢,又點會happy?所以我覺得手機硬件唔錯、上網好快打機好順,但個樣太衰,都係永不錄用,所以htc、samsung同moto都係唔會買。講真,我鍾意摺機同推機,但唔知點解依家d智能手機發咩野神經,幾乎部部都係直身觸屏,簡直悶到爆,冇得比人選擇實在太可惜。同埋,我覺得手機唔應該太大部,但偏偏依家d人又唔知發咩野神經,愈大部愈好(例如samsung galaxy note 有5.3"mon),話要用黎睇片同打機wo。咁樣簡直係本末倒置,手機最重要當然係用黎聽電話同打電話,你攞住咁大部手機放係隻耳仔度聽電話,會舒服咩?而且我覺得咁樣好鬼礙眼!仲有,咁大部電話又點放落口袋裡面?

        所以,我最後買了Sony Ericsson Arc S呢款手機。雖然已經係舊型號,講硬件大把手機勁過佢,而佢亦有好多不足之處,但佢既流線型設計加埋丘比特機殼(粉紅色)已經立刻把我殺死。而且佢起碼可以換電池同埋SD card,夠晒實際。價錢方面,行貨$3698都算ok啦,咁仲想點丫。呢部手機係Sony Ericsson呢個品牌既最後一部手機,幾有紀念價值嫁,希望可以用呢部手機用耐d啦。

延伸閱讀:我不用i-phone
                揮霍

[1]

可以換電已經立於不敗之地
同埋你無講, itune太霸道
部手機有10幾G空間, 但放乜野檔案落去, 卻要itunes批准, 真係痴線

來恩
[引用] | 作者 來恩 | 23rd Jun 2012 01:23 | [舉報垃圾留言]

[2]

[引用] | 作者 就是愛分享 | 13th Jul 2012 11:27 | [舉報垃圾留言]

[3] 92tvshow

[引用] | 作者 92tvshow | 19th Jun 2015 13:39 | [舉報垃圾留言]